محمود اچکزئی کا اعلان: شہباز حکومت کو پُرامن احتجاج سے گھر بھیجیں گے

اسلام آباد (ویب ڈیسک )اپوزیشن اتحاد “تحریکِ تحفظِ آئینِ پاکستان” کے سربراہ محمود خان اچکزئی نے وزیرِ اعظم شہباز شریف کی حکومت کو پُرامن احتجاج کے ذریعے گھر بھیجنے کا اعلان کر دیا ہے۔ اسلام آباد میں مصطفٰی نواز کھوکھر اور جسٹس (ر) شاہد جمیل کے ہمراہ پریس کانفرنس میں انہوں نے کہا کہ آئینی راستے پر چل کر ملک کو بحران سے نکالا جا سکتا ہے۔

محمود اچکزئی نے ملکی حالات پر تنقید کرتے ہوئے کہا کہ “پاکستان میں میرٹ نہیں رہا، نوکریاں بک رہی ہیں، جو نوکری بیچتا ہے ایمان بیچتا ہے”۔ اُنہوں نے حکومتی ناانصافی اور کرپشن کے الزامات لگاتے ہوئے کہا کہ عوام کو اس حکومت سے نجات دلوانے کے لیے بڑے پیمانے پر پرامن احتجاج کیا جائے گا۔

اپوزیشن لیڈر نے زور دیا کہ احتجاج تمام صوبوں میں ہوگا اور “گلگت سے کوئٹہ تک” مشترکہ مہم چلائی جائے گی۔ اُن کا کہنا تھا کہ “ہم کسی کو گالی نہیں دیں گے اور نہ گولی چلائیں گے — ہمارا احتجاج مکمل طور پر پُرامن ہوگا۔”

محمود اچکزئی نے یہ بھی اعلان کیا کہ ملک بھر میں لاکھوں افراد کو سڑکوں پر لایا جائے گا تاکہ اس حکومت کو تبدیل کیا جا سکے۔ انہوں نے بین الاقوامی اور ملکی سطح پر میرٹ، عدالتی عمل اور عوامی حقوق کے تحفظ پر زور دیا۔