شہباز شریف کا جنرل اسمبلی سے خطاب، بھارت پر کڑی تنقید

نیویارک (ویب ڈیسک) وزیراعظم شہباز شریف نے اقوام متحدہ کی جنرل اسمبلی سے خطاب کا آغاز قرآنی آیت کی تلاوت اور مظلوم فلسطینی عوام سے اظہارِ یکجہتی کے ساتھ کیا۔

وزیراعظم نے اپنے خطاب میں کہا کہ پاکستان نے “بنیان مرصوص آپریشن” کے تحت بھارت کو ایسا فیصلہ کن جواب دیا جسے تاریخ ہمیشہ یاد رکھے گی۔ انہوں نے کہا کہ مسلح افواج نے فیلڈ مارشل عاصم منیر کی قیادت میں جرات اور بہادری کی مثال قائم کی جبکہ بھارتی جارحیت کے مقابلے میں پاکستانی قوم سیسہ پلائی دیوار بن کر کھڑی ہوئی۔

شہباز شریف نے کہا کہ بھارت نے عالمی قوانین کی خلاف ورزی کرتے ہوئے شہری علاقوں کو نشانہ بنایا تاہم پاکستان نے اقوام متحدہ کے چارٹر کے آرٹیکل 51 کے تحت حقِ دفاع استعمال کیا۔ انہوں نے پاک فضائیہ کو خراج تحسین پیش کرتے ہوئے کہا کہ ایئر چیف مارشل ظہیر احمد بابر کی قیادت میں شاہینوں نے بھارت کے سات طیاروں کو تباہ کیا، جس پر جنرل اسمبلی کا ہال “پاکستان زندہ باد” کے نعروں سے گونج اٹھا۔

وزیراعظم نے پاکستانی شہداء کو سلام پیش کیا اور کہا کہ شہداء کی قربانیاں ہمیشہ عزت و وقار کے ساتھ یاد رکھی جائیں گی۔ انہوں نے امریکی صدر ڈونلڈ ٹرمپ کا شکریہ ادا کرتے ہوئے کہا کہ انہوں نے بروقت مداخلت کرکے جنگ بندی کروائی اور اس کردار پر پاکستان ٹرمپ کو امن کے نوبیل انعام کے لیے نامزد کرنے کی سفارش کرتا ہے۔

انہوں نے کہا کہ طاقت کی برتری کے باوجود پاکستان نے امن کے لیے جنگ بندی پر آمادگی ظاہر کی ہے۔ ہماری خارجہ پالیسی قائداعظم محمد علی جناح کے وژن کے مطابق پرامن بقائے باہمی پر مبنی ہے اور ہم مکالمے و سفارت کاری کے ذریعے مسائل کے حل پر یقین رکھتے ہیں۔