غزہ میں حماس کے اسنائپر کا حملہ؛ اسرائیلی فوجی ہلاک

غزہ سٹی (ویب ڈیسک) غزہ میں حماس کے اسنائپر نے اسرائیلی فوجی کو نشانہ بنا کر ہلاک کردیا۔ واقعہ ملٹری چیک پوسٹ پر پیش آیا جہاں 21 سالہ اسٹاف سرجنٹ چلاچیو شمعون دمیلاش اپنی ڈیوٹی سرانجام دے رہے تھے۔ اسرائیلی فوج کے مطابق ہلاک ہونے والا اہلکار نہال بریگیڈ کی 932 ویں بٹالین سے تعلق رکھتا تھا اور بیئر شیبا کا رہائشی تھا۔

ابتدائی تحقیقات میں انکشاف ہوا ہے کہ فوجی کیمپ کی چیک پوسٹ پر تعیناتی کے دوران اسنائپر نے انہیں تاک کر گولی ماری۔

یاد رہے کہ گزشتہ روز بھی حماس نے ایک اسرائیلی ٹینک کو نشانہ بنایا تھا جس میں ایک میجر مارا گیا تھا۔

7 اکتوبر 2023 سے جاری غزہ جنگ کے دوران حماس کے ساتھ جھڑپوں میں ہلاک ہونے والے اسرائیلی فوجیوں کی تعداد 850 سے تجاوز کرچکی ہے، جن میں پولیس اہلکار بھی شامل ہیں۔ یہ تعداد ان 1500 اسرائیلیوں کے علاوہ ہے جو 7 اکتوبر 2023 کو حماس کے حملے میں مارے گئے تھے۔

دوسری جانب غزہ پر تقریباً دو سال سے جاری اسرائیلی بمباری کے نتیجے میں فلسطینی شہدا کی تعداد 65 ہزار سے بڑھ گئی جبکہ 2 لاکھ سے زائد افراد زخمی ہیں۔

اسرائیلی فوج کا دعویٰ ہے کہ جنگ کے دوران 22 ہزار حماس جنگجوؤں کو مارا جا چکا ہے۔ فوج نے الزام عائد کیا کہ حماس شہریوں کو “انسانی ڈھال” کے طور پر استعمال کر رہی ہے جس کے باعث عام شہریوں کی بڑی تعداد ہلاک ہوئی ہے۔